بو قفس ده اوچدو بلکه
کتاب "بو قفس ده اوچدو بلکه" سئچیلمیش شعرلر توپلوسو/ نادر الهی / انتشارات آواز
یایین ائوی طرفیندن بیر قیسا آچیقلاما:
چاغداش شعریمیزین سون امپراتورو کیمی تانینان سایین نادر الهی نین آیدان آری، گوندن دورو شعرلرینی بیر مجموعه کیمی یایینلاماق هر بیر کیتاب یایین ائوی و مدنی مرکزین آرزوسو ایسته یی اولا بیلر. نئجه کی سهندی، ساهری، اوختایی، سحری، بی ریانی، بختیاری، منزوی نی و رامیزی نشر ائتمک، هر کسین حیاتیندا بؤیوک بیر اوغور ساییلا بیلر.
نادر الهی، بؤیوک شهریار دئمیشکن «گؤزللرین آخیره قالمیشی» دیر. من دئیه ردیم «ساهر، اوختای و سهند»دن سونرا کی نسلین و شعر جریانی نین آخیرا قالمیش گؤزللری «سحر اردبیلی، نادر الهی و ناصر مرقاتی» کیمی نهنگ شاعرلرین آدینا یازیلا بیلر مطلق!
رامیز روشن: اونون شعرلری ده اؤزو کیمی طبیعی، ساده و ادعاسیزدیر. ائله شعرلر وار کی آدییلا اوزاقدان اوزاغا اوخوجونو چاغیریر. آمما نادر اؤز شعرلرینه آد دا قویمور. اونون بو آدسیز شعرلری اوخوجودان هئچ نه اوممور. اوخوسان دا ساغ اول، اوخوماسان دا. من بیلن، نادر هئچ واخت نثر یازماییب. آمما اونون شعرلرینین بیر چوخو گؤردویو، سئودییی، دردلرینه شریک اولدوغو آدام لار حقینده بالاجا حیکایه لری خاطیرلادیر. یقین کی بو شعرلرین ایلک اوخوجولاری دا همین آدام لار اولاجاقلار و بو شعرلری اوخویوب تسکینلیک تاپاجاقلار.
چونکی نادرین اَن آجی و کدرلی موضوع دا یازیلان شعرینده ده نسه بیر ایشیق، سئوگی و مرحمت وار. او ایشیق دا، او سئوگی و مرحمت ده هم بیزیم مین ایللیک پوئزیامیزین روحوندان، هم ده نادرین اؤزونون و عایله سینین صاف و تمیز معنویاتیندان، اخلاقیندان سوزولوب گلیر.
مدرسه لر آچیلدی
آمما منه دئدیلر:
_ قوی دیلین قالسین ائوده
دیلسیز قالا _ قالا گل
یا اونو توپور گئتسین
آغزینی یاخالا گل ...
...........................................
آیاقلانسان دوشمنه
تحقیرله پالاز کیمی
سازینی وئر تفنگ آل
تفنگی چال ... ساز کیمی
...........................................
بیر یولا سالما وار، یعنی کی گئتمه
بیر یولا سالما وار، یعنی کی واز گئت
او یعنی یئنه ده گؤزوم یولدادی
بو یعنی سن آللاه دای آز گل، آز گئت
