چاقدان آسیلمیش اژدها

کتاب "چاقدان آسیلمیش اژدها" / رقیه کبیری/ انتشارات موغام
توریزم سؤزو بیرینجی دفه 1937- جی ایلده «میللتلرلیقاسی» طرفیندن قوللانیلمیشدیر، دئمک، 24 ساعاتدان آرتیق سورکده، اؤز خرجینه دوغما وطندن آیری بیر اؤلکه یه سفر ائدیب، سونرا قاییدیب گلن شخصه توریست دئییلر. لاتین کؤکلو «توریزم» سؤز سونرالار یونان دیلیندن اسپانیا، فرانسا و نهایت لینگیلیس دیللرینه کؤچموشدور.
توریزم استراحت، اًیلنجه، گؤروش، تانیشلیق و بو کیمی مقصدلرله داییم یاشادیغین مکاندان اؤزل بیر مقصده گئدیب_ قاییتماق آنلامیندا اولسادا، بو گزینتی ایقتصاد، مدنیت، تکنولوژی و بیر چوخ ائلئمانلاردان ائتگیله نیر.
دونیا توریزم تشکیلاتینین حسابلامالارینا گؤره 2000-جی ایلده دونیا اوزره توریزم گلیری 500 میلیلرد، 2004 _جو ایلده 600، 2009- جو ایلده 850 میلیارد و 2013- جو ایلده 1 تیریلیون دولاردان آرتیق اولموشدور .
نفت و نفت محصوللاری تیجارتینی و اوتوموبیل ساتیشینی چاخاندان سونرا ایقتصادیات عرصه سینده توریزم 3-جو یئری توتور.
قئید ائتمه لییم کی، بیزیم اؤلکه نین بو گلیردن نه قدر پایی اولا بیله جه یی حاقدا تاًسَوفله نئت اوزره بیر قایناق تاپا بیلمه دیم.
بو تشکیلاتین وئردییی آمارلار گؤره 2013-جو ایلده فرانسا 84 میلیوندان آرتیق، آمئریکا 69 میلیوندان آرتیق، اسپانیا 57 میلیون، چین 55 میلیون، ایتالیا 47 میلیون، تورکیه 37 میلیون، آلمان 31 میلیوندا آرتیق توریستله سیرایلا بو صنعت ده بیرینجی تا یئددینجی یئری قازانمیشلار.
گونو گوندن سیاحت و گزمک هوسکاری لاری آرتدیقجا،توریزم بیر گوجلو صنعته چئوریلیب و مقصد اؤلکه لرین ایقتصادیَا تیندا چوخ اؤنملی رول اویناییر. بو صنعت اؤلکه لرین گلیرلرینی آرتیریب، آلیش _ وئریش، معمارلیق و آیری صنعت لرین رؤونقینه سبب اولموشدور.
هر بیر توریست اوچون نئچه فاکتی بیلمک اؤنملی نظره گلیر. اؤرنه یین سفر ندنی، ساغلام بیر وجود، زامان، پول و سفر اوچون طیاره، قاطار و بو کیمی راحاتچیلیغی اولان حرکت وسایطی، مقصد اؤلکه نین دیلینی و یا اؤلکه لر آراسینداکی اورتاق دیل و ...
توریزیم دئدییین یالنیز گزیب- دولانماق یا اًیلنجه ایله محدودلاشمیر؛ بلکه آیری صنعتلر کیمی بو صنعتین ده اؤزل بؤلوملری وار.
اکوتوریزم (بیر بؤلگه نین جانلی طبیعتینی تانیماق اوچون گزمک)، ژئوتوریزم (بیر بؤلگه نین جانسیز طبیعتینی و تورپاغینی تانیماق اوچون گزمک)، ایدمانسل توریزم، فضایی توریزم، درمانسل توریزم، مقدس مکانلارین توریزمی، بازار توریزمی، جینسل توریزم، الکترونیک یا مجازی توریزم و سایره، بو صنعتین بؤلوملریندن ساییلیر.
«امیدوار» قارداشلاری، عیسی و عبدالله، اؤلکه میزین بیرینجی توریستلری اولاراق 1333-جو گونش ایلینده ایکی ماتورسیکلتله اؤز سفرلرینی آسیا قیطعه سیندن باشلاییب اوسترالیا، شیمالی قوطب، آمئریکا، آمازون، آفریقا و ... بیر چوخ اؤلکه لری گزمیشلر. 
فضایی توریزمین بیرینجی قادین توریستی مشهد شهرینده آنادان اولوب و ایندیسه آمئریکادا یاشایان خانیم انوشه انصاری اولموشدور. انوشه انصاری 2006-جی ایلین سپتامبر آیینین 20-جی گونو سایوز فضاپیماسی یلا بین الخالق فضایی دوراجاغینا سفر ائدیب، 9 گوندن سونرا یئر اوزونه گئری دؤنموشدور.
خانیم طاهره جوهرچی بیرینجی ایرانلی قادیندیر کی، 2010-جو ایلده آمئریکانین اکوتوریزم تورلاینین بیری سیله جنوبی قوطبا سفر ائتمیشدی. طاهره جوهرچی اؤز مصاحیبه سینده یئله دئمیشدیر:
«بیری جواهراتی سئویر، بیریسی مولک-املاکی، بیریسی ده منیم کیمی طبیعتی گزمه یی ...»
سؤزسوز کی، هر بیر سفرین اًیلنجه و گؤزللیکلریله برابر چتینلیکلری ده اولور. توریست عونوانیله بیر اؤلکه یه سفر ائتمکده، بو سفرین یورقونلوغونو، دوغما اؤلکه دن فرقلی، مقصد اؤلکه نین وطنداشلاریندان آرتیق پول خرجلمه سینی، عادت ائتمه دییین یئمکلردن قیدالانماسینی، اؤز مدنیتیندن فرقلی مدنیته مالکیت اولان انسانلارلا تانیش اولماسینی، همین انسانلارلا یولداش اولوب اونلارلا بیر گه یاشاماسینی و سایره نی گؤز اؤنونه آلیب، اوندان سونرا گزمه یه چیخمالیسان. یاخچی دئمیشلر: « چونکی اولدون دییر مانچی، چاغیر گلسین دن کوراوغلو».