من دردیمین آدامییام
(اسکی دویغولار)
کیان خیاو
حاضیرلایان: بهرام سورگون
ناشر: پارلاق قلم
152 صفحه
بیرینجی چاپ 1399
شابک: 2-30-6993-622-978
هله یارام واردیر
ساغالماییب یارام ائی گول، هله یارام واردیر
سینه مده، سندن ایراق، خال با خال قارام واردیر.
هله قویاق کی آچیلدی بو باغلی قاپ -باجالار
هارا گئدیم من آخی، گئتمه یه هارام واردیر؟!
من اؤز ایتیردیییمی گؤز یاشیمدا آختاریرام
گؤزوم یاشیندا بیر ایتگین دوشن سارام واردیر.
چتیندی قیوراق اولام بیر ده داشلی یوللاردا
کی میخچالی آیاغیم، میخلی قوندارام واردیر.
گلین کیمی بزنن داغلارین باتیب قولاغی
هله دئییر کی گونشدن ده گوشوارام واردیر!
قارا قفسلره اؤیره نمیشم قیزیل قوش تک
قانادلاریمدا گؤر اوخلانمامیش هارام واردیر؟!
گئجه گؤزو بو قاراشر- شبئه کاریمدا دئییل
منه یئتر کی سنین تک بیر آیپارام واردیر.
اؤلومجولمسه ده اؤلمکله پنجه-پنجه ده یم
سنی یشاتماغا البت کی بیر چارام واردیر.
غزل-غزل اوره ییمده سیزیلداییر بیر عشق
ساغالماییب یارام ائی گول، هله یارام واردیر.
تیر آیی 1372