احد فرهمندی
احد فرهمندي 1339-جو ایل، دي آیینین بيرينجي گونو تبریزده دوغولوب. ا.فرهمندي بویا- باشا چاتدیغی تبریز شهرینده ده ایلک و اورتا تحصیلینی آلیب. 1369-جو ایلدن شعرلری تبریز و تهراندا چاپ اولونوب. 1378-جی ایلده عالی درهجهلی ژورنالیست کورسلارینی بیتیریب. گرافیک رشتهسینین تصویرسازی بؤلومونده آکادمیک تحصیل آلیب.
1387-جی ایلده ایران تورکلرینین فولکلورونو توپلاماق مقصدیله یارانان (آذربایجان ائل بیلیمی) درنهیینین قوروجولاریندان بیری ده ا.فرهمندي اولوب. او «ائل بیلیمی»نده توپلانیب نشر اولونان آیلیق درگیلرین 8 ايلدن آرتيق باش یازاری کیمی چالیشيبدیر. ا.فرهمندینین فولکلورا عایید یازیلاری ایراندا نشر ائدیلن بیر نئچه قزئت و ژورنالدا، هابئله «ائل بیلیمی» درگیلرینده چاپ اولونوب. ا.فرهمندي ماراغا ادبیات حالقاسی («آلما») درگیسینین باش یازاری و «نسیم قاراداغ» هفتهلیک قزئتینین فولکلور بؤلومونون آپاریجیسی اولوب.
اونون «باغ معروف» (فولکلور)، «داهیلرین سؤزو» (آفوریزملر)، «اوياق دونیام» (شعرلر توپلوسو)، «اؤلولر سینفونییاسی» (ترجمه، رومان)، «آشورا» (ترجمه رومان)، «زوموررودلو پیچیلتیلار» (ترجمه، شعر) کیتابلاری نشر اولوب، 20دن آرتیق شعر و ادبی کتابلاری ویراستاریلیق ائدرک اونلارا اؤن سؤز ده یازیب، هابئله بیر چوخ ادبی مقالهلری ایران درگی و قزئتلرینده چاپ اولوب. 50دن آرتیق آذربایجانلی قادین یازار، شاعر، صنتعکار ایله آپاردیغی مصاحبهلر «شفق آذربایجان» نشریهسینده چاپ اولوب، همین مصاحبهلر یاخین گلهجکده (قادین دانیشیر) آدی ایله کتاب بیچیمده ایشیق اوزو گؤرهجک.